Lukas 15

Pengumpamian indik Biri-biri sane Ical

Ring dina anu, wenten para tukang nuduk jinah pajeg tur anak rauh ring Hyang Yesus mangda mirengin pengajahan Idane. 2 Nanging para anak lan para agama ngamigmig sekadi puniki, “Tolih ja anake ene! Ia nerima anak ane madosa tur madaar bareng-bareng ajak anake madosa ento.”

3 Punika mawinan Hyang Yesus nyaurin ipun sami nganggen pengumpamian sapuniki, 4 “Umpamine wenten adiri saking ragane sami madue satus (100) ukud, laut wenten aukud biri-birine punika ical. Napike sane laksanayang ipun? Pastika ipun jagi ngalain sane sia dasa sia (99) ukud punika ring pategalane, raris ngrereh sane ical kantos kapanggihin. 5 Tur yening ipun manggihin biri-birine sane ical punika, pastika ipun jagi masukarena laut negen biri-birine punika, 6 tur kabakta budal.

Gambar:

Biri-biri sane Kapanggihin (15:6)

Irika raris ipun ngamanggil para sawitra lan para pisagan ipune saha mabaos sapuniki,

‘Lan ja masukarena ajak tiang! Biri-birin tiange ane ilang suba bakatang tiang!’

7 “Pengandikan Tiange puniki patut! Kenten pada ring wenten sukarena ageng yening wenten asiki anak masalin saking uripnyane sane madosa. Sukarenane punika lebih ageng kapining sia dasa sia (99) anake sane nenten ngamerluang saking urip sane madosa.”

Pengumpamian indik Jinah Perak sane Ical

8 Malih Hyang Yesus nyeritayang pengumpamian sekadi puniki, “Umpamine wenten anak istri sane madue dasa jinah perak, laut asiki saking jinah perake punika ical. Napike sane laksanayang ipun? Pastika ipun jagi ngenyitin lampu tur nyampatang umahnyane. Tur ipun alon-alon ngrereh kantos jinah perake punika kapanggihin. 9 Yening ipun manggihin jinah perake punika, irika raris ipun ngamanggil para sawitrannyane lan para pisagannyane saha mabaos sapuniki, ‘Lan ja masukarena ajak tiang! Jinah perak tiange ane ilang suba bakatang tiang!’

10 “Pengandikan Tiange puniki patut! Sekadi punika para masukarena yening wenten asiki anak masalin saking uripnyane sane madosa.”

Pengumpamian indik Oka sane Ical

11 Malih Hyang Yesus nyeritayang pengumpamian sekadi puniki, “Wenten anak sane madue kalih oka lanang. 12 Tandina, okannyane sane cerikan mabaos kapining bapanyane sapuniki, ‘Bapa, baang ja tiang warisan ane dadi duman tiange.’ Raris warisane kaedumang olih bapanyane kapining makakalih okannyane punika.

13 “Kaceritayang mangkin, okannyane sane cerikan punika ngadol saluirin duman ipune tur luas ka negeri sane adoh.

Gambar: Oka sane Cerikan Ngalain Umahnyane (15:13)

Irika ipun ngulah-laku nganggen jinah.

14 Sasampune jinah ipune telas ring negerine punika, gumine irika keni bencana kakirangan ajengan; tur idup ipune tiwas.15 Raris ipun nglantungang uripnyane ring anake sane asli saking irika, tur anake punika nunden ipun ka tegale miara bawi-bawinyane.16 Ipun kalintang seduk kantos meled ngajeng dagdag bawine. Yadiastun ipun kalintang seduk, nenten wenten anak sane welas ngicen ipun ajengan.

Gambar: Oka sane Cenikan Kakirangan (15:16)

17 “Raris ipun eling tekening deweknyane tur mabaos sekadi puniki, ‘Makejang anake ane maburuh sid bapan tiange motah madaar sakewala tiang dini das mati nandang seduk! 18 Jani tiang lakar luas sid bapan tiange, tur ngorahang kene, “Bapa, tiang suba madosa kapining Sang Hyang Pengardi lan tekening bapa. 19 Tusing ja pantes tiang buin kasambat pianak bapa; dadiang ja tiang buruh bapa.”’ 20 Raris ipun luas nuju umah bapannyane.

“Tatkala ipun kari adoh saking umahnyane, kacingakin ipun olih bapan ipune. Krana bapannyane kapining okannyane, bapane malaib nyagjagin raris ngelut lan niman okannyane punika.

Gambar: Oka sane Cenikan Katerima olih Bapannyane (15:20)

21 Raris okannyane matur, ‘Bapa, tiang suba madosa kapining Sang Hyang Pengardi lan tekening bapa. Tusing ja pantes tiang buin kasambat pianak bapa.’

22 “Nanging bapannyane ngamanggil pengayah-pengayahe saha mabaos, ‘Enggalang ja jemakang penganggo ane paling melah tur salukin! Anggonin ja jerijin limane bungkung tur anggonin ja batisne sandal! 23 Disubane keto, abaang ja tur tampahang ja panak sampi ane mokoh. Lan ja iraga madaar tur masukarena 24 krana pianak tiange ipidan mati jani suba idup buin. Ia ipidan ilang jani suba bakat.’ Raris makasami sane wenten irika ngawitin mapesta.

25 “Duk punika, okannyane sane kelihan sedek ring tegale. Tatkala mamargi budal lan sampun nampek umahnyane, ipun mirengang munyin suling lan igel-igelan. 26 Raris ipun ngamanggil pengayahnyane adiri lan mataken, ‘Ada apake jumah?’

27 “Pengayahe punika masaur, ‘Arin ragane sampun budal tur ajin ragane mrentahang nampah panak sampi mokoh krana okannyane kapanggihin rahayu.’ 28 Nanging oka sane kelihan punika pedih lan nenten meled ngranjing ka jeroan.

“Raris bapannyane medal saha nunas mangdane ipun ngranjing ka jeroan. 29 Nanging okannyane masaur sapuniki, ‘Dingehang ja tiang. Tiban-tibanan mekelone suba tiang ngayah buka anake maburuh tekening bapa. Tusing taen tiang nungkasin prentah bapa. Nanging bapa tusing taen maang panak kambing aukud ja tekening tiang anggon masukarena ngajak timpal-timpal tiange! 30 Nanging mulih pianak bapane totonan disubane nelahang kasugihan bapane anggona maluh-luhan, ditu bapa nampahang jelemane totonan panak sampi ane mokoh.’

31 “Raris bapannyane negesin, ‘Cening, cening. Cening setata ada ngajak bapa, lan makejang ane gelahang bapa sujatine gelah ceninge masih. 32 Sakewala iraga patut mapesta lan masukarena, krana adin ceninge ento suba mati, jani idup buin; ia suba ilang, jani bakat buin.’”

Penuntun mabligbagan ring pasamuan:

1. Ngaturang penyuksma.

“Ngiring ja iraga ngaturang suksma mangkin. Semeton jagi ngaturang suksma indik napi?”

2. Ceritayang ja pakeweh semetone suang-suang raris iraga saling tunas icayang.

“Napike semeton wenten pakeweh mangkin?”

3. Ngwacen utawi mirengin paplajahane puniki.

4. Saurin ja pitakenne puniki:

“Napi sane plajahin iraga indik Sang Hyang Tunggal ring ceritane puniki?”

“Napi sane plajahin iraga indik manusa saking ceritane puniki?”

“Sekadi napike sapatutne iraga nyalanang idup manut pengajahane puniki?”

“Kapining sirake sapatutne iraga nyeritayang malih ceritane puniki?”